وزير النقل: مش هقدر اتحمل مسؤولية حادثة تانية لو اشتغلنا بنفس الأسلوب – مصر

قال كامل الوزير، وزير النقل، إن الرئيس عبدالفتاح السيسي وجهه خلال الاجتماع بعد حادثة تصادم قطاري سوهاج بشكل واضح وسأله «هتقدر تشغل السكة بنفس الأسلوب وميحصلش حوادث تاني؟»، فرد عليه الوزير «لأ يا فندم».

وتابع «الوزير»، خلال اتصال هاتفي ببرنامج «الحكاية»، المذاع على شاشة قناة «MBC مصر»، ويقدمه الإعلامي عمرو أديب، «لو احنا اشتغلنا بنفس الأسلوب هيحصل حوادث تانية وأنا مقدرش أتحمل مسؤولية حادثة تانية، لا أنا ولا الحكومة لأن إراقة الدماء صعب، ومقدرش اشتغل وأنا فاصل جهاز الـ ATC».

وأوضح أنه في نوفمبر الماضي وقع حادث بسيط وجرى معاقبة السائق بالحبس، لأنه كان فاصل جهاز ATC، والذي يسيطر على حركة القطارات وإيقافه إذا كان السينوفور مغلقا، أو إذا كان هناك عرض أو ضبط السرعة إذا تزامن مع وجود إصلاحات بالسكة، «السواقين قالوا خلاص مدام زميلنا اتحبس عشان قفل الجهاز ده فاحنا هنشغله».

وتابع: «سائق قطار سوهاج كان فاصل الجهاز ده، وأنا مش ببرر موقفه، لكن لما حصل تأخيرات في القطارات والناس هاجت علينا، قعدنا مع السواقين واختارنا سواقين على خط الصعيد قدام وكبار، فقولنا المكان اللي فيه تصليحات وتهديات ويوقفك الجهاز غصب عنك أفصله في الحتة دي وأمشي على سرعة من 40 – 50 كم بدل من 8 كم، وبردو السرعة دي هتقدر توقف القطر لو فيه حاجة، قولنالهم أمشوا واستفيدوا من مهاراتكم وخبرتكم وبصوا قدام ولو حصل حاجة قدامكم وقفوا القطر».